ජාත්‍යන්තර ප්‍රීතිමත් දිනය යෙදී තිබූ ඊයේ (20) නිකුත් වූ ලොව ප්‍රීතිමත්ම රටවල් ලැයිස්තුවේ පළමු ස්ථානය ෆින්ලන්තයට ලැබී ඇතැයි විදෙස් මාධ්ය වාර්තා කළේය. එම ලැයිස්තුව එක්සත් ජාතීන්ගේ තිරසර සංවර්ධන ජාලය සහ ඔක්ස්ෆර්ඩ් පර්යේෂණ ආයතනය එක්ව සෑම වසරකම මාර්තු 20 වැනිදාට යෙදෙන ලෝක ප්‍රීතිමත් දිනයේදී නිකුත් කරනු ලබන අතර, නවතම ලැයිස්තුවට අනුව ෆින්ලන්තය ලොව ප්‍රීතිමත්ම රට බවට පත් වී ඇත්තේ අඛණ්ඩව 7 වැනි වරට බව ද වාර්තා වේ. එම ලැයිස්තුවට අනුව ඩෙන්මාර්කය දෙවැනි ස්ථානයට පත්ව ඇති අතර, අයිස්ලන්තය තුන්වැනි ස්ථානයට සහ ස්වීඩනය සිව්වැනි ස්ථානයට පත්ව ඇතැයි ද වාර්තා වේ. පස්වැනි තැන හිමි වී ඇත්තේ ඊශ්‍රායලයට වන අතර, නෙදර්ලන්තයට 6 වැනි ස්ථානය ලැබී තිබේ.
2021 සිට 2023 දක්වා වසර තුනක කාලයේදී ලොව රටවල් 140ක ජනතාවගේ ආයු කාලයේ සාමාන්‍ය අගය අනුව ලැයිස්තුගත කර ඇති එම ලැයිස්තුවේ බ්‍රිතාන්‍යය 20 වැනි ස්ථානයට සහ අමෙරිකාවට 23 වැනි ස්ථානය ලැබී ඇති අතර, ශ්‍රී ලංකාව 128 වැනි ස්ථානයට සහ ඉන්දියාව 126 වැනි ස්ථානයට පත්ව තිබේ. ලොව ප්‍රීතිමත්ම රටවල් අතර 30 වැනි ස්ථානයේ පසුවන සිංගප්පූරුව ආසියාවේ ප්‍රීතිමත්ම රට බවට පත්ව ඇති අතර, ජපානයට 50 වැනි ස්ථානය සහ දකුණු කොරියාවට 51 වැනි ස්ථානය ලැබී ඇතැයි වාර්තා වේ. ලෙබනනය, සියෙරා ලියොන් සහ කොංගෝ රාජ්‍යය එම ලැයිස්තුවේ පහළම ස්ථානවල පසුවන බව ද වාර්තා වේ.
