මේ රටේ සිදුවන වංචා, දූෂණ හා අවභාවිතයන්ගෙන් 70 %කට රාජ්‍ය නිලධාරීන් වගකිව යුතු බවත්, රාජ්‍ය සේවයේ සිටින සමස්ත නිලධාරීන් මේ සඳහා වගකිව යුතු නැති බවත් ඇතැම් නිලධාරීන්ගේ ක්‍රියාකලාපය නිසා සියලු නිලධාරීන්ට ඒ ඇඟිල්ල දිගු වන බවත් එක්සත් ප්‍රජාතන්ත්‍රවාදී හඬ පක්ෂයේ කොළඹ දිස්ත්‍රික් අපේක්ෂක අජිත් ජයසුන්දර මහතා පැවසීය.
දේශපාලනඥයන් සතුටු කර තමන්ගේ ඕනෑ එපාකම් ඉටු කර ගැනීමට ඇතැම් රාජ්‍ය නිලධාරීන් දේශපාලනඥයන් නොමඟ යවන බව ද ජයසුන්දර මහතා පැවසීය.
දේශපාලනයට පත් කරන සියලුදෙනා මෙහෙයවීමේ බලය තිබෙන්නේ රාජ්‍ය නිලධාරීන්ට. මේ රාජ්‍ය නිලධාරීන්ගේ ක්‍රියාකලාපය ගත්තාම සෑහීමකට පත් වෙන්න බැහැ. පත්වෙලා එන දේශපාලනඥයන්ට උපදෙස් දෙන්නේ නිලධාරීන්. එය තමයි දේශපාලනඥයන් ක්‍රියාත්මක කරන්නේ. එහි ප්‍රශ්නයක් තිබෙනවා නම් වගකියන්නත් ඕනෑ රාජ්‍ය නිලධාරීන්. අපි බලයට පත් වුණාම මේවාට විරුද්ධව ජනතා හඬ ඉදිරියට ගෙනයන්න ක්‍රියාකරනවා.
අනුර කුමාර දිසානායක මහතා ජනතාව විසින් ජනාධිපතිවරයා විදිහට පත් කළේ වංචා, දූෂණ නැති කරන්න. එහෙත් තවමත් එහෙම දෙයක් වෙනවා කියා දකින්න නැහැ. අද අපි පක්ෂයක් විදිහට ඉදිරියට ආවේ ජනතාව රවට්ටලා ඡන්ද ගන්න ක්‍රමය වෙනස් කරන්න. එම නිසා අපි ජනතාවට කියනවා මෙවර එහෙම රැවටෙන්නේ නැතිව නිසි ලෙස ඡන්දය භාවිත කරන්න කියලා. අපි අනිවාර්යයෙන්ම වංචාව, දූෂණය නැති කරනවා.ඒ වෙනුවෙන් ජනතාව පෙළ ගස්වලා රටට අවශ්‍ය නායකත්වය සපයන්න අපේ පක්ෂය කටයුතු කරනවායිද පැවසීය.