බොරු තොරතුරු ලබා දී අස්වැසුමට ඇතුළත් වූ 7,000කට එරෙහිව නීතිය ක්‍රියාත්මක කරනවා..
- මුදල් රාජ්‍ය අමාත්‍ය ශෙහාන් සේමසිංහ
ජාත්‍යන්තර මූල්‍ය අරමුදල ශ්‍රී ලංකාව සම්බන්ධයෙන් ඉදිරිපත් කර ඇති යෝජනාවලියෙන් ඉවත් වීමට උත්සහ දැරීම ආර්ථිකමය වශයෙන් සිය දිවි නසා ගැනීමක් බව මුදල් රාජ්‍ය අමාත්‍ය ශෙහාන් සේමසිංහ මහතා පවසයි. අමාත්‍යවරයා පෙන්වා දෙන්නේ විකල්ප යෝජනා ක්‍රියාත්මක කිරීම රට යළි 2022 වසරේ පැවැති මට්ටමටත් වඩා ගැඹුරු අගාධයකට වැටීමක් බවයි. කහටගස්දිගිලිය ප්‍රදේශීය ලේකම් කාර්යාලයේ පැවැති අස්වැසුම දැනුම්වත් කිරීමේ වැඩසටහනකට එක් වෙමින් අමාත්‍යවරයා මේ බව පැවැසීය. ජාත්‍යන්තර මූල්‍ය අරමුදලේ වැඩසටහන වෙත ශ්‍රී ලංකාව යොමුවිය යුතුව තිබුණේ මීට දශක දෙක හමාරකට පමණ පෙර බව පෙන්වා දුන් අමාත්‍යවරයා සඳහන් කළේ එම වකවානුවේ දී ප්‍රතිසංස්කරණ වැඩපිළිවෙළ වෙත ගමන් කළ රටවල් අද සාර්ථක ප්‍රතිඵල අත් කරගෙන ඇති බවයි.
මේ අතර ව්‍යාජ තොරතුරු ලබාදී අස්වැසූම සුබ සාධන වැඩසටහනේ ප්‍රතිලාභීන් අතරට ඇතුළත් වූ 7,000කට අධික පවුල් සම්බන්ධයෙන් නීතිමය පියවර ගැනීමට කටයුතු කරන බව මුදල් රාජ්‍ය අමාත්‍ය ශෙහාන් සේමසිහ මහතා පැවැසීය. ලබා ගත් මුදල් නැවත අයකර ගැනීම සහ ව්‍යාජ තොරතුරු ලබා දීමට එරෙහිව නීතිමය පියවර ගැනීමේ හැකියාව ඇති බවයි අමාත්‍යවරයා පෙන්වා දුන්නේ.
නිවැරැදි තොරතුරු ලබා දීමේ වගකීම ප්‍රතිලාභියා සතු වන අතර අදාළ නිලධාරින් සිදු කරන්නේ එම තොරතුරු තහවුරු කිරීම පමණක් බව හෙතෙම පෙන්වා දුන්නේ ය.
ඔවුන්ට එරෙහිව ඉදිරිපත් වූ විරෝධතා විමර්ශනය කිරීමේ දී හඳුනාගත් මෙම පවුල් දැනටමත් ප්‍රතිලාභී ලැයිස්තුවෙන් ඉවත් කර තිබේ. ලක්ෂ 12ක් පමණ වන අභියාචනා සහ විරෝධතා සලකා බැලීම අවසන් අදියරේ පවතින අතර දෙවැනි අදියරේ අයදුම්පත් භාර ගැනීම ද සිදු වෙමින් පවතී. 200,000 අධික අයදුම්පත් ප්‍රමාණයක් මේ වන විටත් ලැබී ඇති බව පෙන්වා දෙන අමාත්‍යවරයා සඳහන් කළේ අයදුම්පත් භාර ගැනීම මෙම මස 15 දා අවසන් වන බවයි.
අස්වැසුම වැඩසටහනට ඇතුළත් විය හැක්කේ අයදුම්පත් මාර්ගගත ක්‍රමයට හෝ ප්‍රාදේශිය ලේකම් කාර්යාල හරහා ඉදිරිපත් කිරීමෙන් පමණක් බව අමාත්‍යවරයා පැවසීය. එසේ නොමැතිව ප්‍රදේශයේ දේශපාලඥයා හමුවී අස්වැසුමට ඇතුළත් වීමට උත්සහ දැරීම ඵල රහිත බවයි අමාත්‍යවරයා වැඩි දුරටත් කියා සිටියේ.